|
شفيقة ومتولى
قالت له يا أخويا تبت على ايديك قال تتمحكى وتقولى حا تتوبى وتقولى وعد ومكتوبى دى رقعة ما تطلع من توبى.. يا متولى. الساعة دى بنتظرها.. بالسكين ضيع منظرها.. وعزل الجتة من زورها.. يا متولى. ويصرخ المطرب: وقعد يقطع فى شفيقة.. ويرمى فى الشارع.. وجت الحكومة.. قالوا له انزل يا متولى نزل يضحك ولا على باله.. و م السجاير طلع عباله.. وبوليس وأهالى فى استقباله.. يا متولى. وينتهى الموال بهذه الحكمة التى تجعل من متولى بطلاً فيقول: متولى شريف من دى الساعة وخلص م العار بشجاعة والحكم ست أشهر ده إشاعة وصعيدى عنده الشرف غالى أرى النساء سبب البلاوى فى مرضهم احنا بنداوى وعاش بشرفه الجرجاوى وصعيدى عنده الشرف غالى |
يا عم حمزة
احنا التلامــــذة يا عم حمزه ، احنا التلامذة . جن و بلاوى مسيّحه من غير مؤاخذه نكبر ما نكبر ، الله أكبر . طول الزمان ع الامتحان داخلين مبارزه ! هل من مبارز ؟ هل من مناجز ، هل من معارك فى البلد دى ، لسه عايزه ؟ هل من منادى ؟ و نفير جهادى قال لك : أجل ! .. لسه العجل فى رمله غارزه ! لسه ف طريقنا للأَمال ، و الرمله من كل جهه .. زقه مع زميلكم جمال ، يا عقولنا يا متنبهه ! الرمله حلوه ع البلاج ، حلوه على باب الفرح ، لكن لحد كده و بلاش ، أَحسن شعورى بينجرح . اسفخص على لون الاصفرار و الفقر ، والخوف ، و المرض ماشفته الا و دمى فار ، و حلمت بيه زال ، و انقرض . كابس علينا الشئ ده ليه ؟ هو انجليز .. ؟ و الاتتر ؟ دوكهم خطر ، قمنا عليه ، رياح ما خلتلوش أَتر . كان برضه أمشير زى ده ، .. كان برضه أَمشير زى ده ، كان برضه فبراير كده ، قمنا جموعا حاشده ، سلاحنا أَنشودة فدا .. احنا الجواب ، واحنا الندا ، و احنا التلامذه المنجده .. يا عم حمزه ما شتناش ؟ .. الدنيا شافت دمنا ، حنّه ، على ايدين أمنا ، حلفت يكون عيد باسمنا ، عيد ابتدا و لا انتهاش .. يا عم حمزه ، (لا ماليف) و همزه لأَ .. مش عاوزين عيشة و ارثين و لا دنيا جاهزه . ده ابو سد عالى ، شهران ليالى ، زى التلامذة ف الامتحان .. يا عم حمزه |
إتكلموا
اتكلموا .. اتكلموا .. اتكلموا ... محلا الكلام ، ما ألزمه و ما أًعظمه ... فى البدء كانت كلمة الرب الاله ، خلقت حياه ، و الخلق منها اتعلموا ... فاتكلموا فى البدء كانت كلمة الرب الاله روح بجناحين شطار ، و صار للكون مداه . آخر مطافها ، جت و حطت ع الشفاه ، لما البشر ملكوا الوجود ، و استحكموا ... فاتكلموا الكلمة ايد ، الكلمة رجل ، الكلمة بــاب ، الكلمة نجمه كهربيه فى الضباب الكلمة كوبرى صلب فوق بحر العباب ، الجن يا أًحباب من ما يقدر يهدمه ... فاتكلموا الرمل مرمى تحت قبة السما ، مشتاق لقطره من المطر فيها النما ، ملايين سنين عمره ما داقها ، انما فيه كلمة تقدر فى المراوى تِعَوَّمه .. فاتكلموا فيه كلمة تقدر تزرع البور حور ضليل ، و كلمة تقدر تجعل الكوخ بيت جميل ، و ابو العيال و الجلابية الهلاهيل ، فيه كلمه تعطيه مال ، و كلمة تِهندمه .. فاتكلموا لكم السلام ، يا ملفوفين حول اللهب ، يا غواصين فى القلب ع الكلنه العجب ، فى البدء كانت كلمة الرحمن سبب و ما عادش غير الحق كلمة تِتَمَّه فاتكلموا |
الشارع
الشارع قال إخييه…. للحارة ..ريحتك طعميه ، و فول و بصارة …آييياه كل بيوتك بغدادلى مافيهاش تكييف و بيبانك نازلة لتحت ، بدل ماهى طالعة لفوق ، و لا حتى ليكى رصيف و ستاتك بلدى ، و ليل و نهار ع العتبة …قاعدين كده جوق رجالتك نكته و عجبه و لايعرفوا ذوق و عيالك دول نسانيس مقاصيف الرقبة ردت الحارة رد ... خلى الشارع ينسد |
البنت والولد
البنت فارت و الولد خنشر… يا داهيه دقّى ! .. ألف بعد الشر .. يا ريتها كانت نزلة شعبية ، و الا وجع فى البطن .. يتدبر . الا اللى نابهم ، كان قضا وصابهم ، مالوش دوا ، و لا طب ، يا سى أنور . البنت فى الاعدادى لسّاها ، كان إيه لزوم الغصن يتدور…؟ و الا الولد ، ده يا دوب دخل ثانوى ، ليه خده ينطر شوك ، بدا المنظر ؟ مش لما بس يكملوا علومهم .. ؟ ما كانش يومهم ، يا النهار لا غبر ! لو كان عليا .. لا واد ، و لا بنّيه ، أخلى فيهم ( مللى ) يتغير ، غير لما يبقوا أساتذه ، بماهيه ، و بيت جميل ، مفروش على صغّير |
آلهه
ايزيس بتحب بوذا ، و كيوبيد السبب . باخوس سقاها بوظه ، شوف قلة الادب ؟ حتحور و مناف و نبتون ، و اله بقرون و ديل ، طلعوا الاوليمب هيلتون ، و اتعاركوا فى الاوتيل زيوس اتحدى رع ، فى بورصة البشر . أبوللو قاللو هع ، فــشر فــشر فــشر . و الكل نزلوا ركبوا عربيات فارهه ، ان خسروا و لا كسبوا ، الكل آلهه |
وكيل
و بهيه فى المحاكم ، شدت واحد وكيل عند البوفيه كان واقف ، بيشرب جنزبيل و الجنزبيل ده أصله ، للصوت مالوش مثيل مكتوب عليه ف مجلد ، "مرافعات هابيل" يشرب منه المحامى ، يمسح أجدع زميل و يفحم النيابه ، و يقصف النخيل و بهيه ماشية جنبه ، فى كوريدور طويل تشرح له و هى تبكى ، و تبلل مناديل و تقول له : كتير عليا ، يقول لها : قليل اتنين ريال يا وليه ، مبلغ تافه ضئيل خدى بالك م الفصاحه ، و من العلم الاصيل و الاش لما يحصل ، مفعول الجنزبيل عنها و دخل عالقاضى ، دخلة أبو زيد تقيل خبط الترابيزه و قال له ، أنا طالب التأجيـــــل |
دموع ورا البرقع ( فى أعقاب حريق القاهرة )
أنا لوحدى مفيش حاجة مجرد اسم متشخبط على ورقة فى ايد واحد ميدر أصله قومسيونجى يقدمها لتركى والا لخواجه لا يعرف عربى ولا شفقه يروح ماضى بقلم باركر بالافرنجى أروح مرفود و أصبح اسم متعلق على اللوحه تشوفه زمايلى فى الجايه و فى الروحه يفوت عامل فى ايده نص شقة بفول يقف و يقول: يا عالم ربنا موجود مفيش مهرب من التوفير و عامنول ما رفدوا كتير و يدخل وحده فى المصنع ونا أطلع أنا لوحدى أنا لوحدى مفيش حاجه مجرد اسم فى الجلسه بيتنادى ما بين ميت اسم و زيادة و جدول جلستى مليان .. و القاضى مهوش فاضى يناديلى أقول له يا سعادة البيه مدير المصنع الدباح قطع عيشى يقول ايه عشان جريمة ايه؟؟ و ينزل أسئله يسألها ضبيشى و قدامه قانون عقد العمل و دوسيه و اسمى عليه و نضارته و حبابى عنيه ونا مجرد تلات كلمات على الأوراق أسامينا أنا و والدى و اسم اللى اترحم جدى مايسألنيش و يسأل نفسه باستهزاء عن الأوراق و عن اثبات بمستندات أقول له مفيش يقول خلاص ماتفلقنيش و يتمزج محامى الشركة و يهقهق خلاص القاضى أنهى المشكلة رسمى ولا اترافع و لا دافع و لا زعق و فيه أسماء ينادوا عليها غير اسمى وحيد ... مدحت ... شريف ... سامى يخشوا الجلسة بمحامى ونا أخرج و روحى من الشقا بتعرج أنا لوحدى أنا لوحدى مفيش حاجه مجرد اسم كاتبه فى دفتر الاحوال جدع ظابط بوليس فرحان بنجمه يمين و نجمه شمال يقشر موزه و يأشر على المحضر و يبعت عشكرى يجيبنى مع المحضر و أصبح اسم يتكفن بكل لسان من السكان بعيد عن بيتكوا يا أم فلان خلاص بيبيعوف عفش فلان و حا يطير الجهاز كله بوريه و نحاس و ربطة فرش و صاحب الملك يفضل له تلاته جنيه و ستين قرش و تمشى مراتى بعيالها عشان تاكل فى بيت أبوها هناك فى ناس يحبوها أوصلها و فى السكة تقول ربك يعدلها و أشوف كل الدموع بتفور و بتلمع ورا البرقع أقول لازم نعدلها و تدخل هيا بعيالها ونا أرجع أنا لوحدى |
رأس السنة
ويسكى ، براندى ، نبيت ، كونياك ، بيره ، فودكا ، عرقى ، مريسه ، أرمنياك هنا و هناك .. صين ، مصر ، ايطاليا ، أميركا .. تشا تشا تشا ، تانجو ، مازوركا .. افريقيا بترقص دلوكه و سامبا ، روسيا بترقص بولكا احنا بنرقص بلدى و دبكه طراطير و شرايط أصفر و أزرق و أخضر ووشوش خنازير ، و ملايكه ، و جن أحمر .. اللى بيضحك ، و بيسكر ، و اللى بيبكى و بيفكر ، لكن أؤكد لك يا عزيزى - بيسنظر شىء واحد ، هو الراس الخاصة بعام مش عارف كام !! انما يا سلام .. بقى بعد الطراطير و البكا و الرومبا ، لو هذا الراس مظهرش.. لو هذا العام - اللى احنا بنستناه - ماحضرش ... علشان انضربت كذا بومبه !!! |
صديق عمرى
عشــريـن ســنـة عمــرى أنــــا أنـــا العجـــوز الشـــايـب الحـــزين أنــا العجــوز مــن غيــر مـا تمـضـى الســنيـن أنــا العجــوز مــن قـبل ســن الأربعيــن عمــرى النهـــارده رغــم المـــرار ده فــى عمــر ورده عشــريــن ســــــنه كـانـلى صـديـق وكــان حبيــب عمــرى هــو الـلى عـلمنـى المـشــيـب بـــدرى حـضــرت مـولــد كــل شــعرايـه بيضـا عـبــرت ســوالـفــه كمــا الشــهـاب تجــرى كمــا بــرق ســيف الحــق فــى الهيضــا وســط الظــلام تــبرق هــلال هجـــرى تحســب تـاريــخ الكــون حقيقــة ومجــاز كـالأبجديـــة بــالقـلم لــردواز بـالشــعر لابيــض كــان يعـلمنـى أســتاذ تــاريـخ وفــى التــاريـخ أســتاذ قــابلتـه مــن عشــرين ســـنة وكـلمنــى وانــا لســه بــاحبــى فـى الظــلام عـلمنــى مشــية الرجــال سـلمنــى رايــة النضــال ولحــد هــذا اليــوم .. بيـلهمنـى وخيــاله كــل مـا اقــع يقــومنـى وكـل ما اتبعتــر يلمـلمنـى وانهــض واقــوم بأمــل جديــد وبقلــب أقــوى مــن الحــديـــد وليـــد.. عجـــوز.. شــايب.. حـزيـــن وعـمــرى عـشـــريـن ســـنـة |
| الساعة الآن 10:26 AM |
جميع الحقوق محفوظة للمنتدي
لا اله الا الله محمد رسول الله